|
Iqumrhu lokuthetha phandle lenze iintshukumo ngaphandle kwezakhiwo zequmrhu losasazo loMzantsi SABC |
PDF
|
| Print |
|
E-mail
|
Iqumrhu lokuthetha phandle (Freedom of Expression – FXI) belibambe uqhankqalazo ngaphandle kwezakhiwo zequmrhu losasazo loMzantsi Afrika (SABC) eRhawutini. Olu qhankqalazo lungqamene kanye nenkqubo yokugqibela ukusasazwa ligqala uJohn Perlman. UPerlman uthe wabeka umboko wosasazo phantsi kwelifu lokungabonwa kakuhle kwendima edlalwa yiSABC njengequmrhu losasazo loluntu.
Olu qhankqalazo belubanjwe ukuze kufunyanwe impendulo kumaxwebhu athe adluliselwa kweli qumrhu, ngamalungu ephulo lamalungelo ezonxibelelewano kwiFXI. Olu xwebhu lwanikezelwa kweli qumrhu ngethuba leentsukumo ezabanjwa ngeyeNkanga kunyaka ka2006 nalapho iSABC ingazange iphendule.
Olu xwebhu lwaphakamisa iingxaki eziliqela, nezixhalabise uluntu oluxhomekeke kwiinkonzo ezifanele ukuzizwa yiSABC. Owona mba uhamba phambili kwezi ziphakamiso ngowokuba, iSABC ibonakala isimka kumgqaliselo wokuba liziko losasazo loluntu, nebonakala isebenza njengephiko likarhulumente. Ezinye izikhalazo eziqulethwe lolu xwebhu zibandakanya umongo weendaba, ukuvalwa umlomo kwabahlalutyi, kwanokungaboniswa kwebali likaMongameli uThabo Mbeki.
Ukungaphenduli kweSABC kubangele ukuba, iFXI ifake isikhalazo esimaphepha engama20 kwiqumrhu lezikhalazo iICASA, kuba eli qumrhu losasazo laphule umthetho wezosasazo kwanemigaqo yemvume yosasazo. Isikhalazo seFXI singafunyanwa kule dilesi http://www.fxi.org.za.
Ezi ziphazamiso zibandakanya ukungakwazi kwebhodi yeSABC ukulawula eli qumrhu losasazo loluntu. Lo gama ukuvalwa umlombo kwabahlalutyi beendaba kwakujoliswe kumlawuli weendaba uSnuki Zikalala, uqhankqalazo lweFXI luzama ukujonga kumba webhodi yolawulo lweSABC nengakwaziyo ukulawula eli qumrhu ngendlela. Amalungu ebhodi ngabameli boluntu abonyulwe yipalamente nabangenakuyekwa nje.
Abaqhankqalazi bamemelela ukuba, le bhodi yolawulo lweSABC kufuneka itshintshwe kufakwe abantu abazimeseleyo ukulwela inkululeko yokuveza izimvo, kwanamalungelo oluntu okufumana ulwazi, njengoko usitsho umthetho wezosasazo.
Eli bali niliphathelwe ngesihle yi Agenda – siphakamisa ilizwi ngokulingana ngesini. Xa ufuna inkcukacha ezivetshe ungasitsalela umnxeba kwa (031) 304 7001/2/3.
|
